Kryetari i Komunës së Dragashit, Bexhet Xheladini, priti sot në takim drejtorin e Drejtorisë Rajonale të Policisë në Prizren, Faton Alija, dhe komandantin e Stacionit Policor në Dragash, Shaqir Uka, raporton PrizrenPress.
Në kuadër të këtij takimi, u nënshkrua Marrëveshja e Bashkëpunimit për kryerjen e shërbimeve postare ndërmjet Komunës së Dragashit, Policisë së Kosovës dhe Postës së Kosovës. Marrëveshja ka për qëllim pranimin dhe përpunimin e e-Tiketave (gjobave) të trafikut rrugor, të shqiptuara nga Policia e Kosovës, si dhe shpërndarjen e tyre përmes shërbimit postar të veçantë me Lajmërim Marrje (LM), në adresat e qytetarëve brenda territorit administrativ të Komunës së Dragashit.
“Qëllimi i kësaj marrëveshjeje është që të bëhet pranim/përpunimi i e-Tiketave (gjobave) dhe shpërndarja përmes shërbimit postar të veçantë me Lajmërim Marrje (LM), me përmbajtje gjoba nga trafiku rrugor të shqiptuara nga Policia e Kosovës për shkeljen e rregullave të komunikacionit rrugor në territorin administrativ të Komunës së Dragashit, duke i dorëzuar ato në adresën e marrësve/në adresën sipas shënimit në zarfin nga Policia e Kosovës”, thuhet në njoftimin e komunës.
Kryetari Xheladini falënderoi për bashkëpunimin përfaqësuesit e Policisë së Kosovës.
“Kjo marrëveshje do të ndikojë në lehtësimin e shërbimeve dhe procedurave për këtë institucion të sigurisë, veçanërisht në territorin administrativ të Komunës së Dragashit”, theksoi ai./PrizrenPress.com
