Një raund tjetër bisedimesh ndërmjet Prishtinës e Beogradit do të zhvillohet nesër, bën të ditur agjencia e lajmeve e Serbisë, Beta. Duke u thirrur në burime nga Brukseli, kjo agjenci pohon se të dy kryeministrat, Hashim Thaçi i Kosovës, dhe Ivica Daçiq i Serbisë, si zakonisht do të takohen në prani të përfaqësueses së lartë për Politikë të Jashtme e Siguri të BE-së, Catherine Ashton
Tema të dialogut të ri, gjithnjë sipas Beta-s, do të jenë gjyqësia dhe formimi i Asociacionit të komunave serbe në veri të Kosovës. Por, nuk përjashtohen edhe tema të tjera, siç është raundi i ri zgjedhjeve për kryetar të komunës së pjesës veriore të Mitrovicës.
Ky raund bisedimesh do të mbahet paraditën e së mërkurës, por mund të vazhdojë edhe në orët e pasditës.
Thaçi e Daçiq ishin dje në mbledhjen e Këshillit të Sigurimit të KB-së, në të cilën u diskutua për raportin e sekretarit të përgjithshëm të OKB-së, Ban Ki-moon.
Kryeministri i Kosovës mbrëmë ka pasur një takim me komunitetin shqiptar në New York, me ç’rast ka folur për arritjet e Kosovës gjatë gjashtë vjetëve të pavarësisë.