Sculp’Ice që filloi ditën e së premtes në qytetin e Prizrenit, ka filluar që sot, për nder të gjashtë vjetorit të Pavarësisë së Kosovës, të bëj shkrirjen graduale të skulpturave.
Ky festival, i cili u përcoll nga një publik i stërmbushur në Sheshin e Lidhjes së Prizrenit, ka arritur që të realizojë konceptin e planifikuar, e që është “Shkrirja e Barrierave” përmes artit, në praninë e një numri të konsiderueshëm të publikut.
Sonte në Sheshin e Lidhjes së Prizrenit do të iniciohet ceremonia mbyllëse e edicionit të tretë të Sculp’Ice, ku në këtë performancë nën nxehtësinë e flakës do të shkrihen edhe të gjitha skulpturat e realizuara në akull gjatë tri ditëve të kaluara, nga 7 artistët mysafirë.
Skulptorja norvegjeze Elisabeth Kristensen tha se “Skulpturimi në akull, zakonisht bëhet në sheshe dhe komunikimi me publikun është pjesë e punës. Krahas krijimit të veprës duhet të ndaleni dhe të bisedoni me njerëzit. Kjo është njëra nga bukuritë e festivaleve të skulpturës”, ka thënë ajo.
Në kuadër të këtij festivali, vizitorët kureshtarë kanë qëndruar në tendat, ku artistët e Sculp’Ice po realizonin punimet prej akulli.