Afër 30 kandidatë që më herët janë eliminuar nga listat e të pranuarve për studime të doktoratës në UP në fakultete të ndryshme, e të cilët e kanë notën mesatare mbi 8.00 në studimet themelore dhe të masterit, janë ftuar të mërkurën nga dekanatet e fakulteteve për të regjistruar semestrin.
Thirrja u është bërë studentëve vetëm pak kohë pasi “Koha Ditore” kishte drejtuar pyetje në Rektorat se përse është bllokuar procesi i regjistrimit të tyre në doktoratë dhe paralajmërimit se studentët po përgatiten për të protestuar në lidhje me këtë.
Senati i UP-së, para një muaji, ka marrë vendim, që në studime të doktoratës të pranohen të gjithë kandidatët që kanë notën mesatare mbi 8.00, mirëpo ai nuk është respektuar deri më tani.
Afro 150 kandidatë që kanë mbetur jashtë listave të të pranuarve për studime të doktoratës në UP, për sivjet, kanë bërë ankesë në Rektorat, duke kërkuar korrigjimin e listave të të pranuarve. “Koha Ditore”, bazuar në dokumentet e siguruara, pati raportuar se pranimet për doktorata sivjet janë përcjellë me shumë parregullsi dhe shkelje të rënda. /Koha Ditore/