Ish-kryetari i Prizrenit, Eqrem Kryeziu nuk është në dijeni për padinë që ministri i Ministrisë së Mjedisit dhe Planifikimit Hapësinor ,Dardan Gashi, ka bërë ndaj tij, për dhënien e lejeve dhe ndërtimin e shtëpisë në Prevallë.Ai tha se nuk ka lexuar, e as dëgjuar për një gjë të tillë.
“Jo, nuk jam në rrjedhë”, ka thënë shkurt Kryeziu për “PrizrenPress”.
Ministri i Ministrisë së Mjedisit dhe Planifikimit Hapësinor Dardan Gashi, ka paditur të hënën ish-kryetarin e Prizrenit, Eqrem Kryeziun, për ndërtimet në fshatin turistikë, Prevallë.
Sipas tij, Kryeziu duke shfrytëzuar të drejtën e pozitës që ka pasur i ka miratuar vetës leje për ndërtimin e shtëpisë në Prevallë.
“Nëse e shihni objektin e z. Kryeziu në Prevallë – krejt shtëpitë tjera hahen diqysh me sy – shtëpia e tij është sikur njëfarë autobusi i kthyer anash, komplet në kundërshtim me planet që vetë i kanë miratuar në Kuvendin Komunal të Prizrenit”, ka thënë Gashi.
“Në rend të parë, ky e ka nxjerr një leje që nuk përputhet me Planin Rregullativ dhe krejt vendimet që i ka marrë Kuvendi Komunal i Prizrenit”.
“Duke qenë Kryetar ia ka miratuar vetës lejen. Tash, teknikisht leje ka, por mënyra se si ka ardhur deri te ajo leje është vepër penale”.
Ish-kryetari i Prizrenit, Eqrem Kryeziu, ndërkaq nuk ka pranuar të komentojë shumë ngritjen e padisë ndaj tij, nga ministri Dradan Gashi.
“Nëse është kështu siç thoni ju , atëherë kjo qenka çështje e drejtësisë. Jam i kënaqur”, tha Kryeziu. /PrizrenPress.com/