Kryeqytete perëndimore nuk kanë luajtur rol në nxjerrjen e çështjes së krijimit të FAK-ut aktualisht
Krijimi i Forcës së Armatosur të Kosovës është pjesë e presionit që Prishtina bën në kërkim të sovranitetit të plotë, por pjesë e së vërtetës së pakëndshme për kosovarët është se Kosova mund ta arrijë sovranitetin e plotë vetëm me ndihmën e Perëndimit.
Kështu thotë analisti gjerman, Bodo Weber, ekspert për Ballkanin në Këshillin për Politika të Demokratizimit (Demokratization Policy Council), në një intervistë për “Kohën Ditore”.
Aty, Weber thotë se “ka një element të josinqeritetit strukturor në shtytjen e elitave politike për sovranitet të plotë, që ka potencial të ndërlikojë marrëdhëniet e Kosovës me Perëndimin, dhe që shumë lehtë mund të dëmtojë synimet e deklaruara”.
Weber po ashtu thotë se Kosova do të ketë nevojë për njohuritë dhe përkrahjen e Perëndimit në mënyrë që të mund të themelojë ushtrinë, ndërsa insiston se megjithë komunikimin, kryeqytete perëndimore nuk kanë luajtur rol në nxjerrjen e çështjes së krijimit të FAK-ut aktualisht – në prag të zgjedhjeve.