U.d i Rektorit të Universitetit të Prishtinës, Anton Berishaj, ende nuk ka gjetur zgjidhje për personelin e administratës së UP-së, të cilët po kërkojnë që të zgjidhet statusi i tyre i shërbyesve civilë si dhe të behet nivelizimi i pagave me kolegët e tyre nëpër administratat tjera të universiteteve publike. Punëtorët e administratës së UP-së, të cilët kanë hyrë në ditën katër të grevës me kërkesat për rritjen e pagës në bazë të koeficientit që kanë dhe punës që kryejnë në krahasim me degët e tjera të UP-së që gjenden jashtë Prishtinës.
Deri më tash kanë marrë vetëm premtime me fjalë se kërkesat e tyre do të plotësohen. Por, u.d i Rektorit, Anton Berishaj nuk ka nënshkruar asnjë marrëveshje me grevistët, shkruan Express.
Kështu, Fakultetet kanë mbetur të bllokuara për shkak se asnjë shërbim s’mund të kryhet, duke përfshirë edhe pamundësinë që të bëhen pagesat e semestrave.
Sidoqoftë, grevistët po kërkojnë që të zgjidhet statusi i tyre i shërbyesve civilë. Ata nuk kishin përfituar nga rritja e kaluar e pagave, prej 30 për qindëshit, me arsyetimin se nuk i takojnë shërbimit civil.
Ata po thonë se paga e tyre nuk është ekuivalente me shërbyesit e tjerë civilë. Madje kanë bërë një krahasim edhe me administratën e Universitetit Publik të Pejës, “Haxhi Zeka”. Sipas tyre, paga bazë për një shërbyes të administratës në Universitetin e Pejës, arrin shumën prej 400 eurosh, ndërsa paga bazë e tyre është 220 euro.
“Të bëhet nivelizimi i pagave mes punëtorëve të Administratës Qendrore të UP-së dhe të punëtorëve të administratës së njësive akademike të UP-së”, thuhet në kërkesat e grevistëve dërguar Këshillit Drejtues dhe Rektorit të UP-së.