Në fshatin Pastasel u përkujtuan 106 martirë të vrarë e masakruar nga forcat serbe më 31 mars 1999. Kryetari i komunës së Rahovecit Idriz Vehapi, tha se gjaku i të rënëve nuk shkoi kot.
” Familjarët e të vrarëve gjetën forcë për të rindërtuar jetën, duke na dhënë kurajë edhe neve që të vazhdojmë me punë të mira për Kosovën. Në këtë mënyrë ne po e ndërtojmë së bashku vendin tonë, që asnjëherë më të mos e shkelë këmba e vrastarëve. Tani na mbetet të nderojmë kujtimin për ata që e dhanë jetën për lirinë tonë, e nderimi më i mirë është zhvillimi i vendit me punë të ndershme e përkushtim”, tha Vehapi.
Në emër të banorëve të fshatit foli mësuesi Fejzullah Krasniqi. Ai akuzoi organet vendore e ndërkombëtare të drejtësisë, pasi që edhe sot pas 15 vitesh nuk është ngritur asnjë akuzë ndaj atyre që vranë, dogjën e masakruan civilët e pafajshëm dhe të pambrojtur.
Ekzekutimit të forcave policore serbe i shpëtuan 13 fshatarë, shumica prej të cilëve me plagë të rënda në trup. Mirëpo deri më tani dëshmitë e tyre nuk janë shfrytëzuar nga organet e drejtësisë. Në listën e të pagjeturve figurojnë emrat e 12 personave të vrarë në Pastasel.