Pas shumë debateve dhe përplasjeve në mes të përfaqësuesve të partive politike, konkretisht në mes të PDK-së dhe të LDK-së, të enjten në Kuvend do të jetë në rend dite, në lexim të dytë, Projektligji për Veteranët e UÇK-së.
Deputeti i PDK-së, Ilmi Reçica, ka thënë se në Kosovë ka pasur vetëm një komandë ushtarake e cila është udhëhequr nga Shtabi i Përgjithshëm i UÇK-së. “Pa dashur të abstragoj lëvizjen ndër decenie të shqiptarëve për liri dhe pavarësi, filluar nga NDSH-ja deri te lufta e fundit, ky ligj është për veteranët e UÇK-së. Nuk ka pasur komandë tjetër, përpos Shtabit të Përgjithshëm të UÇK-së.
Ministria e Mbrojtjes është themeluar si pjesë e marrëveshjes politike të Rambujesë dhe nëse mendohet për atë ministri ka qenë pjesë e kontrollit politik. Mirëpo UÇK-ja dhe Shtabi i Përgjithshëm e kanë pasur drejtorinë politike, e cila e ka bërë orientimin politik të UÇK-së”, ka thënë Reçica, duke shtuar se do t’u njihet statusi i veteranit të gjithë atyre që kanë luftuar me logo të UÇK-së.
“Është konstatim i të gjithëve se duhet t’u njihet statusi të gjithë atyre që kanë pasur emblemën e UÇK-së. Nuk ka pasur formacion tjetër ushtarak, përndryshe do të kalonim nëpër periudha të tilla siç kanë kaluar popujt dhe vendet e tjera”, është shprehur Reçica, duke e bërë të qartë se edhe dëshmori Agim Ramadani ka luftuar me emblemë të UÇK-së.