Kryeministri i Kosovës, njëherësh kryetar i PDK-së, Hashim Thaçi, ka shpeshtuar vizitat në qytetin e Prizrenit. Ai nuk ka ditë që nuk qëndron në këtë qytet. Vizitat i shfrytëzon kryesisht për takime me strukturat e PDK-së, por edhe me qytetarë. Ndërkaq, kur nuk e zhvillon asnjë prej këtyre takimeve, ai në Prizren vjen, sa për të bërë foto “Selfie”.
Thaçi gjatë fushatës zgjedhore ka qenë njëri prej liderëve politik, i cili çdo ditë ka qëndruar në Prizren. Pas përfundimit të fushatës dhe fitores së PDK-së, ai nuk është dukur për një kohë në këtë qytet. Edhe përkundër ftesës së opozitës që të vijë dhe të formojë sa më shpejtë Qeverinë “Muja III”, Thaçi nuk kishte lëvizur nga Prishtina.
Ai vizitat në Prizren ka filluar t’i shpeshtojë, vetëm pas dënimit 2 vjet me kusht të kryetarit të Prizrenit, Ramadan Muja dhe ish-drejtorëve të Ekzekutivit, të cilët disa prej tyre tashmë janë pjesë e PDK-së.Njëri prej të dënuarëve është edhe kryetari i Degës së PDK-së në Prizren, Minir Krasniqi.
Thaçi të shtunën është takuar në mbrëmje me struktuart e PDK-së në këtë qytet. Ai në këtë takim ka komentuar akuzat që partitë politike po i bëjnë në drejtim të tij dhe PDK-së.
Tha se rivalët politik, më shumë po bëjnë politikë të inatosur se sa programore.
“Edhe në zgjedhjet e radhës PDK do të dalë triumfues karshi rivalëve tonë politk të cilët, po merren me politikë të inatosur”, tha Thaçi. Ai tha se PDK-ja edhe në zgjedhjet e ardhshme nacionale do të dalë fituese.
Ndërkohë, sot Thaçi do të vizitojë edhe Universitetin e Prizrenit “Ukshin Hoti”. Ai bashkë me Ministri i Arsimit, Shkencës dhe i Teknologjisë, Ramë Buja dhe Prof. dr. Zahadin Shemsidini, u. d. Rektor i UPZ-së do të mbajnë një takim me studentët. Takimi do të mbahet në ora 13:00 në Amfiteatrin e ri të UPZ-së./PrizrenPress.com/