Organizata Joqeveritare “EC Ma Ndryshe”, ka filluar sot dorëzimin e shkresave të qytetarëve në organet kompetente komunale, të cilat shkresa janë pranuar përmes platformës online www.merrpjese.org.
Stafi i projektit së bashku me disa të rinjë aktiv të qytetit të Prizrenit, kanë dorëzuar dhe protokoluar në komunë katër peticione elektronike, njëkohësisht, tre prej tyre që janë iniciuar nga nxënës të shkollave të mesme, i janë drejtuar edhe Drejtorisë Komunale të Arsimit.
Peticionet elektronike që janë dorëzuar sot në Komunë dhe në DKA, janë:
– Ndërtimi i një biblioteke;
-Kërkohet kabinet i informatikës në Gjimnazin “Remzi Ademaj”;
-Kërkojmë laborator në shkolla;
-Të ndërpritet praktika e grumbullimit të hollave nga nxënësit për sigurimin fizik të shkollave.
“EC Ma Ndryshe” ka marr përsipër kanalizimin e vullnetit të këtyre nxënësve, studentëve dhe qytetarëve të Prizrenit, përmes adresimit të këtij peticioni elektronik tek autoritetet komunale të Prizrenit.
Pavarësisht se në nenin 69 të Ligjit për Vetëqeverisjen Lokale mbi “Të drejtën e peticionit”, nenet 95 dhe 96 të Statutit të Komunës së Prizrenit mbi “Peticionet” dhe nenin 6 te Rregullores për Transparencë të Komunës së Prizrenit mbi “Peticionet”, nuk parashihen peticionet elektronike, ne besojmë se kjo është një formë inovative e artikulimit të kërkesës dhe vullnetit të qytetarëve dhe duhet të shërbejë si bazë për veprim adekuat nga institucionet përgjegjëse.
Platforma online www.merrpjese.org , është prodhuar nga EC Ma Ndryshe, në kuadër të projektit “Rritja e pjesëmarrjes në vendimmarrje përmes medieve sociale”, përkrahur nga UNDP.