Sheshi që lidh Shtëpinë e Kulturës me Hamamin e Gazi Mehmed Pashës në Prizren ka rreth dy vjet që ka mbetur pa ndriçim të duhur publik.
Kjo hapësirë është lënë në terr, ndonëse është pjesë e projektit të rivitalizimit të sheshit në Rrugën e Farkëtarëve, që synonte promovimin e Zonës Historike të qytetit, madje me ndriçim efektiv publik. Por gjendja aktuale në këtë shesh ka bërë që qytetarët të shprehin pakënaqësitë e tyre. “Nuk ka kuptim që një hapësirë që është në qendër të qytetit të mbetet pa ndriçim. Autoritetet duhet të veprojnë, pavarësisht se kush është fajtor për dëmtimin”, ka thënë Valton Kryeziu, që banon në lagjen afër këtij sheshi.
Rehabilitimi i Rrugës së Farkëtarëve dhe sheshit që e lidh atë me Hamamin e Prizrenit pati kushtuar rreth 240 mijë euro, mjete këto të ndara nga buxheti komunal dhe UN “Habitati” me synimin që të promovohet respektimi i hapësirave publike dhe mirëmbajtja e tyre.
Mirëpo vetëm pak vite pas përurimit, ky projekt është degraduar./koha ditore/