Një 19-vjeçare që thërritej “zebra” dhe “lopa” nga shoqet, për shkak të një çrregullimi të rrallë të pigmentit që jep ngjyrën e lëkurës, ia doli mbanë që të jetë në 14 modelet më të mira të përzgjedhura nga “America’s Next Top Model”.
Chantelle Brown-Young nga Toronto e Kanadasë, në moshën 4-vjeçare u diagonstikua me sëmundjen vitiligo, e njëjta sëmundje nga e cila ka vuajtur edhe ylli i pop-it, Michael Jackson.
Ajo rrëfen se sa e vështirë ka qenë që të pranonte veten dhe të ndjehej krenare me të. “Gjatë fëmijërisë dhe në vitet e para të adoleshencës thërritesha zebra dhe lopa, për shkak të pullave në lëkurë”, shprehet 19-vjeçarja.
Megjithatë, falë bukurisë së saj natyrale, sot Chantelle ka realizuar ëndrrën e saj për të qenë një modele. Në rrjetet sociale numri i fansave i shtohet me shpejtësi, është shfaqur në disa pasarela dhe marka të rëndësishme të modës dhe për më tepër, një muaj më parë u fotografua nga Nick Knight, fotografi ‘që nuk gabon’ e që njihet si zbuluesi i disa modeleve të famshme, njëra prej të cilave është edhe Kate Moss.