Ndërkohë rreth tentimit të policisë për arrestimin e Dardan Molliqajt ka dalë me një kumtesë edhe Lëvizja Vetëvendosje.
“Për shkak të pjesëmarrjes në një protestë kundër privatizimit në vitin 2012, forcat policore sot e rrethuan Lëvizjen Vetëvendosje! në tentim për ta arrestuar Dardan Molliqajn, sekretar organizativ i Lëvizjes dhe njëherësh shef i Shtabit zgjedhor të fushatës”, thuhet në kumtesë, e cila vazhdon
“Tentim arrestimi i sotëm i policisë, me urdhër politik, e shpërfaq panikun e ish pushtetarëve nga rënia e tyre e vazhdueshme dhe ngritja e Lëvizjes Vetëvendosje! si alternativë e vetme e qytetarëve për ndryshim në Kosovë. Të prirë nga ky panik ata po i keqpërdorin institucionet e sigurisë dhe të gjyqësisë për ta dëmtuar Lëvizjen Vetëvendosje!
Ne u bëjmë thirrje këtyre institucioneve që të mos bien pre e urdhrave për motive politike, me qëllim të dëmtimit tonë, sepse Lëvizja Vetëvendosje! dhe aktivistët e saj nuk bëjnë veprime kriminale, por aktivitete politike për të mirën e vendit dhe qytetarëve të tij”, përfundon komunikata.
Policia i jep Dardan Molliqajt një javë afat për dorëzim
Policia i ka dhënë një javë afat për dorëzim Dardan Molliqajt, sekretar organizativ i Lëvizjes Vetëvendosjes, merr vesh Koha.net. Atë policia e kishte kërkuar edhe një herë tjetër, por ai nuk ishte dorëzuar. Megjithatë ai ka vazhduar të marrë pjesë në veprimtaritë publike politike të Vetëvendosjes.
Policia ka rrethuar sot në orët e para të mëngjesit selinë e Lëvizjes Vetëvendosje, në Prishtinë, me qëllim të arrestimit të Dardan Molliqajt, sekretarit të saj. Gazetarët, që kanë shkuar në vendin e ngjarjes për të marrë vesh se çfarë po ndodhte, janë në pritje të një sqarimi nga zyrtarët policorë për arsyet që ai duhet të arrestohet. Jozyrtarisht përmendet pjesëmarrja e tij në protesta të ndryshme të Vetëvendosjes gjatë viteve të kaluara.
Policia e Kosovës nuk ka arritur ta dërgoi në Prokurori Dardan Molliqajn, Sekretar i lëvizjes Vetëvendosje, shkruan gazeta express.
Ai ka refuzuar të paraqitet në Polici pas hetimeve që janë zhvilluar ndaj tij për pjesëmarrje në një protestë për privatizimi.
Ndërkaq, zëdhënësi në Policinë e Kosovës, Agron Borovci, ka demantuar lajmin se sot në orët e hershme është rrethuar selia e Lëvizjes Vetëvendosje, në Prishtinë.
“Policia ka pranuar një thirrje prej Gjykatës, për t’i dërguar një thirrje Dardan Molliqajt, për t’u paraqitur në Gjykatë. Nuk ka pasur asnjë rrethim, përveç që i është dërguar ftesa, dhe asgjë më shumë”, ka thënë Borovci për Indeksonline.
Por, Erzen vraniqi deklaron se forca të policisë në këto momente e kanë rrethuar selinë e Lëvizjes Vetëvendosje! në Prishtinë për ta arrestuar Dardan Molliqajn.
“Forca të policisë e kanë rrethuar selinë Lëvizjes Vetëvendosje në Prishtinë. Ata duan ta arrestojnë Dardan Molliqajn, shefin e shtabit për pjesëmarrje në aksione”, ka konfirmuar përmes një sms zëdhënësi i Vetëvendosjes, Erzen Vraniqi, raporton epoka e re.