“Kancelarja Merkel fton Thaçin në Berlin”. Kështu njoftoi Zyra e kryeministrit të Kosovës dy ditë para zgjedhjeve parlamentare në Kosovë.
Në lidhje me këtë ftesë “Koha Ditore” ka kërkuar, para zgjedhjeve në Kosovë, sqarime nga një zëdhënës i Qeverisë gjermane.
Në një përgjigje me shkrim dërguar këtë javë, zëdhënësi fillimisht ka konfirmuar se më 28 gusht 2014 në Berlin do të mbahet një konferencë, ku janë ftuar kryeministrat, ministrat e ekonomisë dhe të punëve të jashtme të Ballkanit (Slloveni, Kroaci, Serbi, Bosnjë, Mal i Zi, Maqedoni, Kosovë dhe Shqipëri). Qëllimi i konferencës është të bisedohet për “gjendjen në rajon”.
Por zëdhënësi i Qeverisë gjermane ka saktësuar se “siç e do rendi në raste të tilla, ftesa u dërgohet qeverive të shteteve” të Ballkanit.