Mësuesja e një shkolle fillore në jug të Francës u ther për vdekje përpara nxënësve nga nëna e njërit prej tyre.
Sipas BBC, Fabienne Terral- Calmes, 34 vjeç, u sulmua të premten në mëngjes në shkollën Edouard Herriot.
E dyshuara për krimin, një 47- vjeçare, u arrestua më pas në shtëpi.
Mësohet se autorja e krimit po çonte vajzën- pesë ose gjashtë vjeçe- në shkollë.
Por ajo nxori një thikë të gjatë dhe bërtiti “nuk jam hajdute” përpara se të sulmonte.
Ajo i nguli thikën vetëm njëherë në gjoks.
Një prokuror, që shkoi ndër të parët në vendin e ngjarjes, tha se mësuesja ishte në arrest kardiak në klasë, por nuk mbijetoi.
Disa media thonë se autorja e krimit ka deklaruar në polici se e bëri krimin pasi mësuesja sillej keq me vajzën e saj.
Por disa përfaqësues të grupeve të prindërve thonë se nuk ka pasur probleme mes tyre.
Disa media të tjera thonë se gruaja që kreu krimin njihej për neglizhencë ndaj fëmijëve.