Radhitet tek emrat më të denjë të industrisë së muzikës në vendin tonë. Është ky kompozitori e këngëtari i njohur Korab Shaqiri i cili këtë sezon publikut të vet po i dhuron një këngë me videoklip shumë interesant. Se për çfarë bëhet fjalë më saktësisht ka treguar vetë ai në një bisedë për gazetën Tribuna.
“Është një këngë bashkë me klip i cili promovon të gjithë bukurinë shqiptare. Në të do të prezantohen pothuajse të gjitha trevat shqiptare. Që nga pjesa antike ku është Apolonia p.sh nga Mbretëresha Teuta e deri në Korfuz poshtë. Pastaj kemi shkuar në Guci lartë, Ulqin e pjesët tjera të trevave shqiptare në Mal të Zi. Më pas ka pjesë nga Ohri, Shkupi e vende të tjera, pa lënë anash normalisht edhe pjesë nga vendet në Kosovë e Shqipëri. Ky klip është një promovim i bukurive shqiptare që nga ato detare deri tek ato malore”, ka thënë këngëtari në fillim të bisedës, ndërsa ka treguar se ky projekt në tërësi është i menduar nga vetë ai.
“Muzika e këngës ‘Welcome to Albania’ është krijimtari e imja, orkestrimi po ashtu. Për tekst kam bashkëpunuar me babin , Ilir Shaqirin. Edhe ideja e klipi është po ashtu ide e imja. Si projekt është i menduar në përgjithësi nga unë”, ka zbuluar ai.