Suad Fejzuallahu i lindur në vitin 1972 ne Çellopek të Tetovës, i rënë në luftën e Bosnjës (Prijedor 1992), është zhvarrosur këtë të premte. Trupi i tij nga Prijedori është sjellë në vendlindje, por e veçanta është se, siç thotë vllau i Suadit për TetovaSot se trupi i Suadit ishte ende i freskët dhe teshat thuajse të padëmtuara, vetëm fytyra pak e nxirë. Trupi i viktimës pas 22 vitesh, ende nuk është dekompozuar apo kalbur.
Mjeku ligjor, Agim Ramadani, për TetovaSot, thotë se toka prej argjili ose argjili të pasur me kripra minerale dhe lagështi e mbron trupin nga kalbja, sepse ndihmon në konservimin e indeve të buta. Nga ana tjetër, edhe dijetarët islam e komentojnë moskalbjen e trupit pas varrimit. Sipas tyre nuk ka argumente nga Sheriati se trupat e shehidave nuk kalben ashtu sikur trupat e pejgamberëve. Ka transmetime se Allahu ia ka ndaluar tokës të ‘hajë’ ose ti kalb trupat e pejgamberëve ndërsa për shehidat nuk ka ardhur asnjë transmetim. Por, vërtetohet fakti se në histori, disa trupa të gjetur kanë qenë të paprishur, pra dyshohet për trupa shehidësh, por ky fakt nuk përbën pjesë të asnjë dispozite islame.
Pra, trupi i zhvarrosur i Suad Fejzullahut, i varrosur 22 vite më parë në Prijedor të Bosnjës, ka dy mundësi ti ketë mbijetuar dekompozimit, e para është interpretimi shkencor mbi përbërjen e tokës argjilore dhe e dyta se Allahu e ka bërë këtë si nderim ndaj të vdekurit.
Ndryshe, dy javët e fundit nga Prijedori janë zhvarrosur 280 të vrarë në luftë në një var masiv dhe pritet të gjenden edhe viktima tjera. /TetovaSot/