Përveç reagimit për ngarkimin me punë të Ramiz Lladrovcit në Tiranë, blloku paszgjedhor që pretendon të qeverisë në mandatin e ardhshëm, asnjëherë nuk ka potencuar se kush do të jetë objekt i rishikimit pasi të këtë ardhur në pushtet.
Mirëpo, zyrtarë nga tri subjektet që e përbëjnë bllokun politik, të kontaktuar nga gazeta, kanë thënë se shumë vendime të cilat nuk janë respektuar proceduat, do të anulohen, ndërsa vendimet që kanë shkelje ligjore, do të dërgohen në Prokurori.
Avni Arifi, këshilltar i kryetarit të Aleancës për Ardhmërinë e Kosovës, në një prononcim për gazetën, ka thënë se asnjë vendim i marrë nga kjo qeveri që prej 30 qershorit e tutje, nuk është publikuar në faqen zyrtare të Kryeministrisë dhe se këto vendime kanë të bëjnë me emërime dhe transfere të stafit politik në shërbyes civilë si dhe dhënie të tenderëve pa u respektuar procedurat.
“Çdo vendim i cili është marrë që prej 30 qershorit e tutje, nuk është publikuar në faqen e Kryeministrisë. Këto vendime kanë të bëjnë më dhënien e tenderëve, bëhet fjalë për emërime dhe transfere të stafit politik në shërbyes civilë si dhe për vazhdimin e kontratave në mënyre joligjore personave që udhëheqin me shërbyesit civilë. Ne do t’i rishikojmë të gjitha këto vendime dhe aty ku ka shkelje të proceduarave, ato vendime do të anulohen”, ka thënë Arifi. /Tribuna