Ditën e mërkurë, Komisioni i Ekonomisë, i drejtuar nga deputeti i Partisë Socialiste Erion Braçe, u mblodh për një seancë dëgjimore me inspektoren e përgjithshme të Bankës së Shqipërisë, Elivar Golemin.
Por, nga sa u pa, inspektorja e BSH nuk ishte e pranishme në këtë seancë dëgjimore, e për këtë mungesë, kreu i këtij komisioni deklaroi se përbënte “një akt të rëndë” e një “rast të paprecedent në historinë e Kuvendit”, duke e akuzuar më tej inspektoren se nuk ka përmbushur detyrën e saj, transmeton Top Channel.
Erion Braçe bëri një përshkrim të situatës aktuale në Bankën e Shqipërisë, duke theksuar se “përmes shkeljeve të rënda administrative në BSH, është kryer një krim i rëndë me pasojë vjedhjen e 713 mln dollarëve”.
Ndërkohë, pikë së pari ai ngarkoi me përgjegjësi inspektoren e përgjithshme të BSH; e cila nga ana e saj kishte deklaruar se refuzonte të merrte pjesë për shkak se nuk përfaqëson Bankën e Shqipërisë, duke refuzuar kështu kërkesën e Kuvendit; për të cilën theksoi se ky rol emërohet dhe shkarkohet nga Kuvendi.
Duke e përshkruar situatën aktuale institucionale në BSH si të rrënuar tërësisht, Braçe ftoi edhe njëherë të gjitha organet kompetente të vijojnë hetimet dhe t’i shkojnë deri në fund atyre për të zbardhur jo vetëm fajtorët, por edhe përgjegjësit për këtë krim të rëndë. Gjithashtu bëri të ditur se ditën e enjte do të ketë sërish seancë dëgjimore, këtë herë me ish-inspektorin e përgjithshëm të BSH.