Kryetari i Komunës së Prizrenit, Ramadan Muja, vazhdon që të kryejë këtë funksion publik ani pse afër gjashtë muaj më parë ishte dënuar nga Gjykata Themelore e Prizrenit për shpërdorimin e detyrës dhe autoritetit zyrtar në katër raste të ndryshme, për të cilat vepra ishte dënuar me dy vjet burgim me kusht dhe 30 muaj ndalim të ushtrimit të funksioneve në administratën publike.
Ankesa e mbrojtësit të tij në Gjykatën e Apelit e paraqitur brenda afatit ligjor e ka pezulluar ekzekutimin e aktgjykimit, ndërkohë që organet e gjyqësorit kanë pranuar se ka pasur vonesa sa i përket shqyrtimit të kësaj ankese.
Sipas zyrtarëve të gjyqësorit, del se Gjykata Themelore e Prizrenit është vonuar me dërgesën e lëndës në Gjykatën e Apelit, gjë që ka krijuar pastaj efekt zinxhirë në trajtimin e kësaj ankese. /Koha Ditore