Njerëzit që nuk i pëlqejnë fare janë ata të cilët nuk kanë sens të humorit, kurse gjërat që e bëjnë nervoz janë sirenat e veturave dhe hedhja e mbeturinave nëpër rrugë. Kështu të paktën ka treguar kryetari legjendar i Partisë së Fortë, Visar Arifaj, i cili në intervistën ndryshe në gazetën Tribuna ka shpalosur edhe detaje të tjera rreth jetës së tij private.
Si fëmijë ka qenë shumë i urtë, mirëpo duke u rritur ka filluar të bëhet më çapkën. Qysh në klasën e pestë të shkollës fillore ka mësuar që të ikë nga orët e mësimit dhe të kopjojë gjatë testeve. Këtë përshkrim të fëmijërisë e ka bërë Visar Arifaj gjatë intervistës ndryshe në gazetën Tribuna. Ai gjithashtu ka zbuluar se pasioni i tij është çiklizmi.
Tribuna: Si e kujtoni fëmijërinë tuaj, me pak fjalë?
Arifaj: Si fëmijë kam qenë i urtë, mirëpo kur kam dalë në klasën e pestë kam mësuar taktikat e ikjes nga ora, po ashtu kam mësuar edhe kopjimin, sidomos në lëndët që kërkonin të mbahej mend shumë siç ishte ajo e gjeografisë.
Tribuna: Cili është libri dhe filmi që ju kanë lënë më së shumti përshtypje?
Arifaj: Libri që e kam lexu, që më ka lënë përshtypje e që mendoj që duhet më bë obligative me lexu është “The Hitchhiker’s Guide of the Galaxy’ nga Douglas Adams kurse prej botës kinematografike më pëlqejnë shumë filmat e Halil Budakovës.
Tribuna: Cili është gjësendi më i shtrenjtë në dollapin tuaj?
Arifaj: Janë vizatimet e shkollës fillore dhe ndoshta pas disa vitesh do t’ia jap si donacion Galerisë së Arteve të Kosovës.
Tribuna: Cila është e meta juaj më e madhe?
Arifaj: E kam vërejtur që i kam dy të meta; e para është së gjithmonë vonohem kur të dal dhe e dyta është se shpërqendrohem shumë lehtë kur jam duke biseduar me dikë.
Tribuna: Çfarë vëren fillimisht te një femër?
Arifaj: Fillimisht ja ndjej aromën dhe me pëlqen kur i vjen era e mirë, por jo me pas aromë të ndonjë parfumit, sidomos nëse është parfum i vaniljes. Nuk mund ta duroj assesi.
Tribuna: Cilëve tipa të njerëzve u ikni?
Arifaj: Ju iki njerëzve që nuk janë të hapur dhe nuk kanë sens të humorit dhe që nuk e kuptojnë hajgaren.
Tribuna: Pasioni juaj i preferuar?
Arifaj: Pasioni im i preferuar është çiklizmi.
Tribuna: Çfarë mund të ju nervozoj në moment?
Arifaj: Sirenat e veturave, njerëzit që pështyjnë në rrugë dhe ata që gjuajnë mbeturina në rrugë dhe muzika e keqe më bëjnë shumë nervoz.
Tribuna: Kur keni kërkuar për herë të fundit ndihmë?
Arifaj: Çdo ditë kërkoj ndihmë, më së shumti kërkoj kur kam nevojë të konsultohem për ndonjë çështje më dikë nga shoqëria ime.
Tribuna: Cila është frika juaj më e madhe?
Arifaj: Jam një njeri që nuk kam frikë nga asgjë dhe nga askush. Nuk frikësohem as nga ndonjë kafshë apo insekt, madje i dua krejt kafshët dhe krejt insektet më pëlqejnë.
Tribuna: Pa çfarë nuk dilni kurrë nga shtëpia?
Arifaj: Nuk dal pa rroba dhe këpucë. Por gjithmonë i kontrolloj xhepat se mos i kam harruar çelësat, kuletën apo telefonin.
Tribuna: Çfarë i thoni më së shpeshti vetes kur shikoheni në pasqyrë?
Arifaj: E lëvdoj veten shumë dhe vazhdoj me i shtrydhë puçrrat.
Tribuna: Kur keni hipur për herë të fundit në trafik urban?
Arifaj: Para dy jave. Por, ma shumë udhëtoj me biçikletë se më duket se mbërrij më shpejt në destinacion.
Tribuna: Nëse i kishit fituar në lotari 1 milion euro, ku i kishit shpenzuar më parë?
Arifaj: Me siguri se i kisha shpenzuar me entuziastët e teknologjisë në Kosovë. Kishim bë çdo gjë që na bie ndërmend dhe një pjesë i kisha shpenzuar me ik prej Prishtinës kur merr koha e ftohtë.
Tribuna: Destinacioni juaj i ëndrrave?
Arifaj: Gjatë periudhës së jetës time, destinacion të ëndrrave e kam vizitën në planetin Mars.
Tribuna: A bëni punë shtëpie?
Arifaj: Po shpesh. Sidomos laj rroba dhe përgatis ushqim për veten. /Tribuna/