Forumi për trashigimi kulturore në Rahovec përzgjedh dy shtëpi për Bujtina

Në kuadër të projektit, “Shndërrimi i shtëpive ose kullave në bujtina” i financuar nga CHwB (Trashëgimia Kulturore pa kufij), mbështetur nga Komuna e Rahovecit, u mbajt takimi i Forumit për trashëgimi kulturore në Rahovec.

Gearda Demiraj, menaxhere e projektit në fjalë në CHwB, paraqiti disa objekte të vjetra të banimit në qytetin e Rahovecit, si mundësi që këto objekte të shndërrohen në bujtina për turistët e huaj.

Zonja Demiri tha se në bashkëpunim me Drejtorinë Komunale për Kulturë janë evidentuar disa shtëpi të vjetra banimi, mirëpo jo të gjitha i plotësojnë kriteret për të qenë bujtina. Disa janë lënë në mëshirën e kohës dhe tashmë janë jashtë mundësisë për adoptim, mirëpo ka edhe të atilla që mund të përshtaten për akomodim të turistëve.

Karakteristikat dalluese të këtyre shtëpive japin shpresë se Rahoveci mund të vizitohet nga të huajt në të ardhmen. CHwB ka ndarë mjete modeste për këto projekt, gjithsej 10.000 euro, mirëpo ka mundësi që të bëhet rialokimi i mjeteve. Me renovimin e këtyre objekteve do të rritet vlera e tyre kulturore, mirëo mund të sjellin të ardhura edhe për pronarët e tyre.

Drejtori i Drejtorisë për Kulturë, Rini dhe Sport në Rahovec Osman Hasku, ritheksoi se kriteri bazë për përzgjedhjen e një shtëpie apo kulle për këtë projekt është se ato duhet të jenë më të vjetra se 50 vjet, ndërsa janë përzgjedhur objekte me arkitekturë të vjetër dhe karakteristike për Rahovecin.

Projekti në fjalë i kontribuon edhe mbrojtjes së objekteve të vjetra që përbëjnë trashëgiminë tonë kulturore. Po ashtu synohet që Rahoveci të bëhet zonë atraktive turistike kulturore, duke marrë për bazë bujarinë dhe mikpritjen tradicionale, si dhe elementin rural karakteristik. Unë jam i bindur se në këtë mënyrë Rahoveci do të futet në hartën turistike të Kosovës dhe në fakt ne kemi mjaft për t’i treguar botës, shtoi drejtori Hasku.

Anëtarët e Forumit, ku bënin pjesë edhe Eloida Pallaska e Hidajete Zhuri nga MMPH, përfaqësues të shoqërisë civile, si dhe zyrtarë të DKRS-së, vendosën që fillimisht të përzgjidhen dy shtëpi për këtë qëllim. U zgjodh shtëpia e vjetër e Fehmi Kadriut, shtëpia në bashkëpronësi të Agim Haxhiymerit e Sadedin Bugarit, ndërsa u la e hapur mundësia që të studiohen edhe disa propozime të tjera në të ardhmen, ngase vetëm këto dy bujtina nuk do të arrijnë të përmbushin kërkesat gjithnjë në rritje të turistëve.