Kanë mbetur edhe 6 ditë deri në mbajtjen e seancës konstituive në Kuvendin e Kosovës, dhe palët vazhdojnë t’i mbajnë pozicionet e tyre duke mos lëshuar pe për tejkalimin e ngërçit politik në vend.
Nëse PDK dhe blloku LVAN vazhdojnë të qëndrojnë me pozicione të ngrira, atëherë mund të presim që ndërkombëtarët me rekomandimet e tyre të dalin me zgjidhje. Kështu vlerësojnë njohësit e rrethanave politike në vend.
Analisti Imer Mushkolaj, në një prononcim dhënë gazetës Tribuna, ka thënë se arritja e një kompromisi mes palëve duket të jetë i vështirë, për faktin që dy taborët tashmë kanë krijuar plane dhe agjenda se si do të veprojnë në të ardhmen.
“Arsyeja pse nuk po mbërrijnë në një kompromis është për faktin se për ta është shumë e dhimbshme që të heqin dorë nga planet dhe agjendat që paraprakisht i kanë caktuar. Kështu që besoj që nëse nuk mund të gjendet zgjidhja në seancën që është paralajmëruar për 2 tetor, atëherë do të ndërhyjnë ndërkombëtarët”, ka thënë Mushkolaj.