Në shkollën fillore “Abdyl Frashëri” të lagjes Ortakoll mësuesja Besire Muja, bashkëshortja e Ramadan Mujës ka një formë të veçantë të mbajtjes së mësimit në krahasim me mësimdhënësit tjerë. Ajo përfundon mësimin sipas orarit të vet dhe jo orarit që vlen për çdo mësimdhënës.
Asambleistja e Lëvizjes Vetëvendosje! në Prizren, Drita Millaku thotë se kjo po shkakton problem tek prindërit e nxënësve sepse nuk dinë kur të shkojnë t’i marrin fëmijët e tyre. Më e keqja është se nuk kanë ku të ankohen për këtë parregullsi.
“Në arsim kësi lloj privilegji nuk ka vetëm zonja Muja”, ka thënë Millaku.
Një privilegj të tillë e kanë edhe bashkëshortet e drejtorëve, siç është rasti i Drejtorit të Administratës Ilir Baldedaj, i cili punësoi të shoqen e vetë si sekretare në shkollën “Ibrahim Fehmiu” pa kurrfarë konkursi.
“Pa konkurs edhe në shkollën “Abdyl Frashëri” është zgjedhur sekretari i kësaj shkolle duke e trashëguar këtë post si në monarki nga babi i vetë, i cli pas pensionimit e solli të birin në krye të detyrës që ushtronte më parë”.
“Por kësilloj privilegjesh në arsim u bënë edhe për ish-koordinatorin e arsimit Shukri Çuni, i cili pasi i fitoi votat për asamble komunale, nuk iu lejua që t’i mbaj dy poste, atëherë e rehatuan në shkollën e mesme “Remzi Ademaj“ kuptohet, pa konkurs. Pa konkurse u punësuan edhe dy mësimdhënëse në shkollën e mjekësisë” Luciano.Matroni” në lëndën e letërsisë shqipe”.
“Ky trend i punësimeve ilegale pa konkurs po vazhdon pothuajse në të gjitha shkollat, si fillore ashtu edhe në të mesme. Në shkollën fillore “Fadil Hisari” pa konkurs janë punësuar edhe dy mësimdhënëse tjera. Njëra mësuese për ciklin e ulët e tjetra për gjuhën shqipe. Një shqetësim në arsim e kanë edhe mësimdhënësit të cilëve nuk po u paguhet kualifikimi. Në njërën anë detyrohen të vazhdojnë arsimin kualifikues shtesë, e në anën tjetër pagesa fillon shumë vonë”
“Brengosëse është edhe pushimi i lehonave .Të gjitha ato nëna që hynë në pushimin e lindjes, nuk paguhen për muaj të tërë, pavarësisht se në këtë kohë kanë më së shumti nevojë për ato para të cilat u takojnë edhe me ligj. Dhe në anën tjetër, të gjitha ato që punësohen për zëvendësimin e atyre lehonave e përfundojnë mandatin pa u paguar fare. Tash shtrohet pyetja, ku shkojnë këto para? Organet e drejtësisë duhet urgjentisht t’i fillojnë hetimet për këto raste”/PrizrenPress.com/