Paralajmërimin e kryetarit të LDK-së, Isa Mustafa, për t’u konsultuar me degët e kësaj partie për të gjetur një zgjidhje për formimin e institucioneve, analisti politik Imer Mushkolaj e ka vlerësuar si tendencë të Mustafës për ta shpëtuar veten nga ndëshkimi për shkak të humbjeve të tri palë zgjedhjeve.
Mushkolaj ka thënë për “Epokën e re” se Mustafa është duke tentuar ta korrigjojë edhe vendimin e tij, ku Ramush Haradinajt ia ka besuar postin e kryeministrit.
“Isa Mustafa ka probleme brenda partisë që udhëheq dhe veprimet eventuale brenda partisë i ndërmerr me qëllim që ta shpëtojë veten nga ndëshkimi për humbjen e tri palë zgjedhjeve, si dhe të korrigjimit të vendimit për t’ia besuar liderit të një partie të vogël si AAK-ja krijimin e qeverisë, duke mos e çuar kështu në vend besimin e marrë nga votuesit”, ka deklaruar Mushkolaj.
Ai nuk e ka përjashtuar mundësinë që në këtë fazë LDK-ja mund të afrohet me PDK-në e Hashim Thaçit.
“Nuk e hedh poshtë mundësinë e afrimit të LDK-së me PDK-në dhe koalicionit ndërmjet këtyre dy partive. Nuk është hera e parë që LDK-ja bën sikur shfaqet refuzuese ndaj PDK-së, pastaj krijojnë bashkë koalicionin qeveritar. Kemi këtu parasysh situatat parazgjedhore në të kaluarën, kur zyrtarë të lartë të LDK-së e kritikonin PDK-në dhe mblidhnin vota në emër të refuzimit për të qeverisur me Hashim Thaçin, në anën tjetër po këta zyrtarë bëheshin ministra të Thaçit”, është shprehur Mushkolaj.