Lideri i PDK’së Hashim Thaçi pas një takimi të kryesisë ka folur për mundësinë e koalicionit me LDK’në. Ai ka thënë se gjithmonë atyre u ka bërë thirrje për komunikim dhe formim të institucioneve.
Kreu i PDK’së ka folur para gazetarëve pas takimit të kryesisë së PDK’së. Ai është pyetur rreth mundësisë së krijimit të një koalicioni PDK-LDK.
Pikërisht për këtë Thaçi ka theksuar se gjithmonë u ka bërë thirrje partive për të komunikuar.
“Unë vazhdimisht kam ftuar liderët e partive të interesuara për bashkëpunim. Natyrisht mesazhi im i është drejtuar gjithmonë partive të qendrës së djathtë, kështu që ai mesazh vlen ende. Ne jemi të gatshëm për t’u ulur për të biseduar për formimin e institucioneve.
Ndërkaq duke komentuar ridizajnimin e marrëveshjes LDK-AAK-NISMA, Thaçi ka thënë se një gjë e tillë nuk i ndihmon Bllokut.
“Asnjë ridizajnim marrëveshjesh, apo tendencë e re nuk do të funksionojë pa angazhim dhe komunikim të drejtpërdrejt me fuqinë fituese, sepse ky është një verdikt qytetar I dhënë në zgjedhjet e tetë qershorit. Çdo pretendim i ri çon në bllokadë të re” ka thënë ai./express/