Ushtruesi i detyrës së Kryeprokurorit të Shtetit, Sylë Hoxha, sot ka pritur në takim Ambasadoren e Shteteve të Bashkuara të Amerikës në Kosovë, Tracey Ann Jacobson.
Në fillim të takimit, u.d. i Kryeprokurorit falënderoi Ambasadoren Jacobson për ndihmën që vendi i saj e ka dhënë për sistemin prokurorial të Kosovës. Sipas u.d. të Kryeprokurorit, ndihma e Shteteve të Bashkuara të Amerikës ka qenë shumë e rëndësishme në funksionalizimin dhe forcimin e këtij sistemi. Ai po ashtu, ka kërkuar që mbështetja dhe bashkëpunimi në mes të sistemit prokurorial të Kosovës dhe të Shteteve të Bashkuara të Amerikës të vazhdojë edhe në të ardhmen.
Gjatë takimit, u.d. i Kryeprokurorit Hoxha ka njoftuar Ambasadoren Jacobson për punën e sistemit prokurorial, sidomos në luftën kundër krimit të organizuar, korrupsionit, terrorizmit dhe krimit në përgjithësi dhe në të njëjtën kohe ka kërkuar ndihmën amerikane ashtu që lufta kundër këtyre dukurive të jetë sa më efikase.
Në anën tjetër, Ambasadorja Jaobson ka vlerësuar shumë bashkëpunimin me sistemin prokurorial, në veçanti, por edhe me tërë sistemin e drejtësisë në Kosovë, si dhe ka premtuar vazhdimin e bashkëpunimit dhe mbështetjes për sistemin prokurorial edhe në të ardhmen.