Premtimin që e kishte bërë para dy viteve, studiuesi francez Gilbert Gardes e mbajti. Në atë kohë ai kishte thënë se vizitat e tij kanë të bëjnë me mbledhjen e materialit për librin e tij, për të cilin thotë se është një përshkrim i trashëgimisë së Kosovës nëpër shekuj. Tani ai ndodhet prapë në Kosovë, për të cilën mendon se është pasqyrë e civilizimit.
Gilbert Gardes ka lindur në vitin 1942, në Saint Etienne, të Francës. Ka përfunduar studimet për histori të artit dhe ka doktoruar në të njëjtën fushë, në Universitetin Lumiere, në Lion. Ka doktoruar edhe në letërsi, në Universitetin e Sorbonës. Gardes ishte ndër hulumtuesit më të shquar të gjuhës dhe historisë së artit në CNRS (Qendra Nacionale për Hulumtime Shkencore) që nga viti 1975 e deri në vitin 2006,shkruan Tribuna
Shquhet si njohës shumë i mirë i identitetit dhe trashëgimisë. Deri më tani ka botuar mbi 240 tituj në fushën e arkitekturës, artit bashkëkohor, skulpturës, ikonografisë, urbanizmit, pikturës, biografisë, udhëtimeve dhe fushave tjera.