(I plotësuar) Ka përfunduar seanca e Kuvendit, në të cilën pika kryesore e rendit të ditës ishte miratimi i Komisioneve Parlamentare në Kuvend.
Miratimi i komisioneve ka dështuar, për shkak të mospasjes së shumicës, për aprovim.
—
Haxhiu: Kapja po vazhdon
Deputetja Albulena Haxhiu nga Vetëvendosje ka thënë se kapja dhe kontrolli i kësaj Qeverie po vazhdon edhe në Kuvend.
Sipas saj, koalicioni qeverisës kontrollon 10 komisione, ndërkohë rregullorja e Kuvendit e thotë se kryesia do ta ketë parasysh ndarjen e komisioneve në proporcion me fuqinë politike të grupeve, ndërkohë propozimi që është sjellë tregon që kjo ndarje nuk është kështu, madje siç tha ajo, me shumë apetit dhe zell u kujdesën që disa komisione mos të drejtohen nga opozita.
VV do të angazhohet që gjatë këtij mandati të ndryshohet kjo praktikë në mënyrë që Kuvendi mos të bie pre e kontrollit qeveritar.
Kurse, Armend Zemaj i LDK-së, tha se jemi vendi i vetëm që kemi kaq shumë Komisione. Edhe Alma Lama nga LDK tha se 80 % e anëtarëve të komisioneve nuk din anglisht dhe kjo ndoshta është bërë që ministri i jashtëm, Hashim Thaçi të kryejë punë pa ditur anëtarët e Komisionit të Punëve të Jashtme.
Kurse, Kadri Veseli iu është përgjigjur se disa e dinë e disa e meshojnë.
—
Fillon seanca, ankohet opozita
Seanca e Kuvendit të Kosovës ka filluar me ankesa të opozitës sa i përket ndarjes së komisioneve parlamentare.
Visar Ymeri nga Vetëvendosje shprehu pakënaqësinë me mënyrën e ndarjes së komisioneve, duke thënë se opozita do të duhej të drejtonte më shumë komisioneve për shkak se do ta mbikëqyrnin më mirë Qeverinë.
Donika Kada Bujupi e AAK-së tha se formula e ndarjes nuk avancon demokracinë dhe mbikëqyrja e qeverisë ka mundur të jetë më e mirë nëse do të ndaheshin një komision nga pozita, një nga opozita.
Ndërkohë, komunitetet pakicë po refuzojnë të tërhiqen nga komisionet.