Deputetja e Vetëvendosjes, Albulena Haxhiu, ka vendosur të mos i përgjigjet Prokurorisë së Shtetit, e cila i ka dërguar ftesë për intervistim lidhur me hedhjen e gazit lotsjellës në Parlament.
Deputetja ka komentuar edhe lajmet që nuk po i pëlqejnë Vetëvendosjes, duke thënë se ato janë vënë në shërbim të pushtetit dhe kundër përfaqësuesve të popullit.
Lexojeni të plotë reagimin:
Duket qartë se prokuroria po i jep prioritet arrestimit të neve deputetëve që protestuam në Kuvendin e Republikës kundër ‘Zajednicës’ së Serbisë dhe faljes së 9.000 hektarëve Malit të Zi. Një fushatë mediale, sidomos e disa portaleve të afërta me regjimin, është vënë në shërbim të prokurorisë dhe policisë kundër neve përfaqësuesve të popullit.
Më lejoni ta sqaroj përfundimisht se unë nuk do t’i përgjigjem këtyre thirrjeve politike të prokurorisë për biseda informative. Për më tepër, pas kidnapimit të Albin Kurtit nga Policia e Kosovës në mbrëmjen e 12 tetorit 2015, pres që tani të hetohen, gjykohen e dënohen ata nga policia dhe politika e Kosovës që e planifikuan, urdhëruan dhe zbatuan kidnapimin. Tashmë ka një kallëzim penal të Albin Kurtit ndaj Policisë së Kosovës i cili ndodhet në sirtarët e Prokurorisë Themelore dhe asaj të Shtetit.