Kryetari i Kuvendit të Kosovës, Kadri Veseli, ka pritur sot në një takim kongresistin amerikan Eliot Engel, me të cilin ka biseduar për zhvillimet aktuale në Kosovë, perspektivën evropiane të saj, si dhe për bashkëpunimin ndërmjet dy vendeve.
Pasi i ka uruar mirëseardhje në Kosovë, kryeparlamentari Veseli i ka shprehur falënderime të veçanta kongresistit Engel për angazhimet dhe kontributin e tij të pandalshëm, si në sensibilizimin e çështjes së Kosovës, ashtu edhe në përpjekjet për çlirim dhe pavarësi, të cilat janë finalizuar më 17 shkurt 2008 në Kuvendin e Kosovës.
Kryeparlamentari Veseli e ka njoftuar kongresistin amerikan edhe me proceset nëpër të cilat po kalon vendi ynë, duke i shpalosur edhe sfidat dhe vështirësitë me të cilat po përballet.
Ndërsa kongresisti Elliot Engel, duke i çmuar lartë të arriturat e deritashme të Kosovës, ka premtuar se do të vazhdojë të angazhohet për të mirën e Kosovës edhe në të ardhmen.
Engel ka thënë se Qeveria, Kongresi dhe populli amerikan, do të vazhdojnë të jenë përkrahë Kosovës në rrugëtimin e saj drejt integrimeve euroatlantike.