Trajneri i Interit, Antonio Conte, është ankuar se skuadra e tij u dëmtuar nga gjyqtarët në barazimin 2:2 kundër Romës të dielën, edhe pse kritikat e ashpra i ruajti për orarin e ndeshjeve.
Një pikë në Stadiumin Olimpik nuk ishte i mjaftueshëm për synimet e zikaltërve për titull, por i kualifikoi edhe matematikisht ata në Ligën e Kampionëve.
Trajneri italian këmbëngul se Alexandre Kolarov shkaktoi faull në Lautaro Martinezin në aksionin që çoi te goli i barazimit 1:1 për Romën.
Ky rast u rishikua në VAR nga vetë gjyqtari kryesor i ndeshjes, i cili vendosi se nuk kishte faull dhe se goli ishte i rregullt.
“Nuk kishte aspak dyshime. Ishte faull i qartë. Lojtari i Romës nuk e preku topin, por e goditi Lautaron në nyje. Kam respekt për gjyqtarët. Edhe ata po kalojnë nëpër një situatë të çuditshme. Nuk mendoj se meritojnë kritika, por sonte gjyqtari gaboi. Ndodh”, tha Conte.
Ai u ankua edhe për orarin e ngjeshur të Interit, duke thënë se kundërshtarët e tij po pushojnë më shumë mes ndeshjeve.
“Dua që njerëzit t’ia hedhin një sy listës së ndeshjeve të Interit, sepse ky kalendar është i çmendur dhe është bërë me qëllim për të na shkaktuar probleme. Ne luajmë gjithmonë natën, ndërsa ekipet me të cilat përballemi gjithmonë e kanë nga një ditë më shumë pushim krahasuar me ne. Këto janë fakte”, shtoi ai.
“Të gjithë bëjnë kompromise por në fund Interi gjithmonë e pëson më së keqi.”