KPMSHCK ka marrë vendim që të aprovojë si të bazuar ankesën e Qemajl Krasniqit, shef i zyrës për informim, duke e anuluar vendimin e kryetarit të Komunës së Rahovecit Idriz Vehapi për transferimin e përhershëm të tij në sektorin e rinisë dhe sportit.
Vendimi i KPMSHCK obligon kryetarin Vehapi që në afat prej 15 ditësh të shfuqizojë vendimin për transferim dhe të zbatojë vendimin për rikthim të Krasniqit në pozitën Shef i zyrës për Informim dhe protokoll.
Kryetari i Rahovecit Idriz Vehapi më 17.10.2014 pati marrë vendim që të transferojë përhershëm Krasniqin në pozitën shef i sektorit për Rini dhe Sport në kuadër të Drejtorisë Komunale për Kulturë, Rini dhe Sport.
Këshilli i Pavarur Mbikëqyrës po ashtu ka anuluar edhe vendimin e Komisionit Komunal për Zgjidhjen e Kontesteve dhe Ankesave të datës 17.10.2014, i cili ka refuzuar si të pabazë ankesën e Krasniqit. Në vendimin e KPMSHCK thuhet se vendimi i kryetarit Vehapi dhe Komisionit Komunal për Ankesa është në kundërshtim me ligjin për shërbyesit civil Nr.03/L-192, si dhe me Rregulloren nr. 06/2010 për transferimin e shërbyesve civil.
Me këtë vendim konstatohet shkelja e ligjit dhe procedurave nga ana e kryetarit Vehapi dhe Komisionit Komunal për Ankesa, pasi që në kundërshtim me ligjin ka transferuar zyrtarin Krasniqi, duke i ulur edhe koeficientin e pagës në kundërshtim me rregulloren në fuqi.
Kryetari Vehapi ka afat prej 15 ditësh për të zbatuar vendimin e KPMSHCK, që konsiderohet edhe si gjykatë e shërbimit civil të Republikës së Kosovës./RahovecPress.com/