Kandidati i BD-së për kryetar të Prizrenit, Zafir Berisha i shoqëruar edhe nga bartësi i listës Osman Hajdari dhe kandidatja për asambleiste Albana Balaj, kanë takuar shumë qytetarë të lagjes “Arbana” të Prizrenit në shkollën “Ibrahim Fehmiu”.
Berisha tha se “Arbana” si lagje periferike e qytetit të Prizrenit ka nevojë për mbështetjen e institucioneve edhe për faktin se disa nga rrugët dhe rrugicat e kësaj lagje vazhdojnë t’i përngjajnë vendeve të varfra të Afrikës.
“Ju garantojmë se përveç infrastrukturës prioritet i yni do të jetë mirëqenia sociale, përmes krijimit të mundësive për investitorë vendorë e ndërkombëtar që të krijojmë vende pune ku do të punësohen të rinjtë e qytetit të Prizrenit e lagjes ‘Arbana'”, tha Berisha.
Ndërsa bartësi i listës, Osman Hajdari, i garantoi të pranishmit në këtë tubim se me ardhjen e BD-së në krye të Komunës së Prizrenit dhe kryetarit Zafir Berisha 120 të rinj do të punësohen qysh në 6 mujorin e parë përmes projekteve të veçanta në administratë, shëndetësi dhe arsim. Nërkaq, Albana Balaj, kandidate nga kjo lagje, u bëri ftesë qytetarëve të këtij lokaliteti që mos të humbin nga mundësia që të jenë pjesë e mbështetjes masive të Bashkimit Demokratik, parti kjo e cila garanton ndryshime pozitive në qytetin e Prizrenit./PrizrenPress.com/