Policia e Kosovës mbrëmë ka arrestuar katër aktivistë të Lëvizjes Vetëvendosje! të cilët po shkruanin parulla në qytetin e Ferizajt.
Këtë e ka bërë të ditur kjo lëvizje përmes një njoftimi për media, duke thënë edhe në mëngjesin e sotëm ka pas të arrestuar tjerë, në mesin e të cilëve edhe aktivisti Kushtrim Dakaj, i cili ka qenë pjesë e aksionit për rrëzimin e rrethojave tek objekti i Qeverisë së Kosovës.
Ai është arrestuar në shtëpinë e tij në Prishtinë.
“Policia e Kosovës ka kërcënuar me arrestimin edhe të aktivistëve të tjerë që morën pjesë dje në aksionin e heqjes së rrethojave shtesë të vendosura nga Qeveria. Po ashtu, mbrëmë në Gjilan, policia ka kërcënuar aktivistët e Lëvizjes që nëse vazhdojnë me shkrimin e parullave do të arrestohen”, thuhet në njoftimin e Vetëvendosjes.
Sipas kësaj lëvizje, Isa Mustafa nuk e ka ndërmend t’i ndal masat e dhunshme.
“Të tilla masa janë aplikuar në Kosovë sa herë që pushtetet e ndryshme kanë dashur të qojnë përpara projekte që janë në kundërshtim me vullnetin dhe interesin e popullit të Kosovës. Qeveria po e tensionon situatën me këto veprime, duke treguar që është në gjendje ta krijojë ‘Zajednicën’ edhe nëse kjo kërkon ushtrim të dhunës dhe represionit mbi popullin e vet”, thuhet në njoftim.
Aktivistët e arrestuar janë Dritëro Hyseni, Kushtrim Cakolli, Leotrim Cakolli, Labinot Halimi dhe Kushtrim Dakaj.