Prokurori i përgjithshëm i Meksikës ka akuzuar shtatë oficerë të burgut për përfshirje në arratisjen e liderit famëkeq të drogës, Joaquin Guzman, të shtunën. Shtatë punonjësit e burgut janë arrestuar pasi akuzohen se e kanë ndihmuar të largohet.
Sipas zyrtarëve meksikanë janë edhe 15 persona të tjerë që po hetohen nëse janë të përfshirë në arratisjen e “El Chapos”, si dhe pritet që të ketë edhe arrestime të tjera.
Derisa hetimet të përfundojnë, të shtatë punonjësit do të mbahen në qelitë e Guanajuatos.
Presidenti, Enrique Pena Nieto, i cili sapo është kthyer nga një udhëtim jashtë shtetit, tha se ka të njëjtën ndjenjë zemërimi si të popullit meksikan. “Të gjithë ata që janë pjesëmarrës në ikjen e Gozmanit do të dënohen me peshën e plotë të ligjit”, tha presidenti.
Ministri i Brendshëm i Meksikës, Osorio Chong deklaroi se rojeve iu deshën 18 minuta për të shkuar në qelinë e “El Chapos” nga momenti kur ai iu humbi nga sytë. Ndërkohë që hetuesit po punojnë në vërtetimin nëse kjo kohë ka qenë e mjaftueshme për Guzmanin që të largohet nga burgu. Lideri i drogës mbikëqyrej përmes kamerave 24 orë në ditë, transmeton Shekulli.
Në një sondazh në gazetën meksikane “Reforma”, rreth 88% e meksikanëve besonin se “El Chapo” ka shpëtuar me ndihmën e personave të brendshëm në burg, dhe shumë të tjerë fajësuan paaftësinë e autoriteteve sesa dinakërinë e Guzmanit.