Policia bëri të ditur se ka arrestuar një adoleshent, i cili akuzohet se ka luftuar jashtë vendit.
Nuk saktësohet se ku ka luftuar 18- vjeçari, por mendohet se ai ka qenë pjesë e Shtetit Islamik.
“Nga Specialistët e Sektorit për Aktet Terroriste në Drejtorinë e Policisë së Shtetit, më datën 23.04.2015, në orët e para të mëngjesit u arrestua në flagrancë shtetasi: J.Ç., 18 vjeç, banues në Lushnjë.
Ky shtetas u deportua nga policia greke në PKK Kakavijë, për veprën penale “Pjesëmarrja në veprime luftarake në një shtet të huaj” dhe në Kakavijë është marrë në dorëzim nga Specialistët e Sektorit për Aktet Terroriste në Drejtorinë e Policisë së Shtetit, ku në përfundim të veprimeve të para hetimore është bërë arrestimi i tij.
Materialet në ngarkim të këtij shtetasi i kaluan Prokurorisë për Krimet e Rënda Tiranë, për veprime të mëtejshme, për veprën penale “Pjesëmarrja në veprime luftarake në një shtet të huaj”, parashikuar nga neni 265/a i Kodit Penal,” thuhet në njoftimin e policisë./Mapo/