Pronarët e tokave në Vlashnje nuk janë të kënaqur me çmimin e shpronsimit ku është paraparë ndërtimi i impiantit për trajtimin e ujërave të zeza.
Anëtari i Këshillit të pronarëve të tokave, Ali Rizanaj, tha se shuma e përcaktuar nga organi shpronësues prej rreth 1500 euro për një ari është i papranueshëm.
“Vlera reale e tokave në këtë zonë të Vlashnjes është duke shkuar deri në 6000 euro për ari”, thekson Rizanaj.
Ai thotë se kërkesat e pronarëve duhet të shqyrtohen edhe një herë nga organet komunale dhe se shuma e caktuar të jetë reale.
Rizanaj fajëson kryetarin e komunës, Ramadan Mujën, për këtë shqetësim të këtyre pronarëve nëse fillojnë punimet pa marrëveshje paraprake rreth kësaj çështje.
Këmbëngulës në kërkesat e tyre janë edhe pronarët tjerë të tokave, Afrim Berisha e Ledian Hoxhaj, të cilët thonë se nuk do të lejojnë që punimet të zhvillohen në realizimin e këtij projekti.
Lidhur me këtë shqetësim të këtyre banorëve të Vlashnjes, ne kemi kontaktuar zyrtarin komunal për informim, Ymer Berisha, i cili përmes telefonit na tha se komuna nuk e ka caktuar shumën e kompensimit, por një gjë e tillë është vendosur nga një komision qeveritar.
Ai me këtë rast tha se protestat nuk janë veprim i zgjidhjes së problemit, por shtoi ai, ankuesit duhet që të drejtat e tyre të pretenduara t’i adresojnë në gjykatë.
Ndryshe, prej disa ditësh kanë filluar punimet në vendosjen e gypave të kolektorit për impiantin, ndërsa pas kërkesës së pronarëve të tokave , kompania e angazhuar në implementimin e projektit sot ka ndërprerë punimet që kanë qenë të parapara të realizohen në tokat e këtyre pronarëve. /TV Prizreni