Kryetari i Komunës së Malishevës, Ragip Begaj dhe drejtori i arsimit, Avdi Morina, kanë pritur sot në një takim pune, kryetarin e Shoqatës Kulturore “Kosova-Shkup” në Turqi, Rexhep Gyndyz, me të cilin kanë biseduar për mundësinë e rritjes së bashkëpunimit mes Malishevës dhe Orhangasit, në fushën e arsimit, ku pritet që shumë shpejt të nënshkruhen edhe marrëveshjet e bashkëpunimit mes shkollave.
Fillimisht, kryetari Begaj e ka falënderuar kryetarin e shoqatës “Kosova-Shkup”, Rexhep Gyndyz, për kontributin e tij, në rritjen e bashkëpunimit mes dy vendeve, e sidomos mes qyteteve dhe komunave, ku si rezultat i kësaj, edhe janë binjakëzuar komunat e Malishevës me atë të Orhangasit.
Nga ana tjetër, Rexhep Gyndyz, tha se “si shoqatë, janë të interesuar në rritjen e aktiviteteve, përmes së cilave përfitojnë në shkëmbim të përvojave edhe Malisheva, edhe Orhangasi, siç është arsimi, ku mund të shkëmbehen përvojat në fushën e arsimit profesional, si dhe në arsimin e mesëm, atë fillor dhe në funksionimin e çerdheve publike”.
Shumë shpejt pritet që së paku katër shkolla nga Malisheva, të nënshkruajnë marrëveshje bashkëpunimi me katër shkolla nga Orhangasi, ku do të përfshihen një shkollë e mesme profesionale, dy shkolla fillore dhe çerdhja për fëmijë./PrizrenPress.com/