(E plotësuar) Kryesuesja e Kuvendit të Kosovës, Flora Brovina, ka kërkuar takim me përfaqësuesit e partive politike për në ora 15.30.
Zyrtarë të PDK’së kanë thënë se ende s’ka vendim rreth shtyrjes eventuale të vazhdimit të seancës konstituive.
Ndërkohë, burime të Express kanë thënë se kërkesën për shtyrje të seancës e kanë bërë përfaqësuesit e minoriteteve me arsyetimin se nuk janë njoftuar se çka do të ndodh në seancë.
Megjithëkëtë, nëse shtyhet seanca konstituive, atëherë, kjo po bëhet pasi PDK nuk i ka numrat për të votuar Kryeparlamentarin, derisa, partitë tjera kanë paralajmëruar se do ta votojnë Isa Mustafën për Kryetar të Parlamentit.
Një procedurë e tillë e ndjekur në seancën e parë ishte cilësuar si jokushtetuese.
Aktualisht, në Kuvendin e Kosovës është duke u mbajtur mbledhja e Grupit Parlamentar të PDK’së. Edhe partitë e Bllokut, po ashtu, janë duke mbajtur takim rreth hapave që do të ndërmerren nesër në seancën konstituive.
Shtyhet seanca konstituive e Kuvendit?
Disa burime bëjnë me dije se vazhdimi i seancës konstituive të Kuvendit të Kosovës, e paralajmëruar për nesër, ka mundësi që të shtyhet për një ditë tjetër.
Kryesuesja e seancës, Flora Brovina, e kontaktuar para pak minutash nga portali Koha.net, interesimit për saktësinë e këtij informacioni iu përgjigj se ende nuk është vendosur një gjë e tillë.
“Ende nuk është vendosur asgjë. Jemi në mbledhje”, ka thënë Brovina, që nuk ka dashur të flasë më gjatë.