Jam e shokuar me deklaratat e zonjës Lunacek. Ne kemi punuar shume që ky proces të përfundojë shpejt. Ditëve të ardhshme do të shkojmë në Bruksel për të kërkuar sqarime për këtë çështje, ka thëne Vlora Çitaku për deklaratat e Lunacek se deri në vitin 2016 nuk do të këtë liberalizin vizash për Kosovën.
Kuvendi i Kosovës ka diskutuar ecurinë e negociatave mes Kosovës dhe Bashkimit Evropian për Marrëveshjen e Stabilizim Asociimit, të filluar në tetor të vitit të kaluar. Deputetët opozitarë kanë pasur shumë kritika për qeverinë dhe Ministrinë e Integrimeve, duke thënë se MSA-ja i është dhënë Kosovës më shumë si rezultat i dialogut me Serbinë, dhe jo si rezultat i plotësimit të kritereve. Kjo, pasi sipas deputetëve, në njërën anë konstatohet se sundimi i ligjit mbetet sfidë, derisa ndër kapitujt kryesore të MSA-së është sundimi e ligjit dhe drejtësia.
Por, në anën tjetër Ministrja e Integrimeve Evropiane Vlora Çitaku, në prezantimin e raportit për ecurinë dialogut për MSA-në, tha se nisja e negociatave për Marrëveshjen për Stabilizim Asociimit në mes të Kosovës dhe Bashkimit Evropian është moment historik në kuadër të procesit integrues të vendit tonë.
“MSA do të jetë marrëveshja e parë kontraktuale që ofron perspektiv të qartë drejtë anëtarësimit të plotë të Kosovës në BE. Qëllimi i MSA-së është ofrimi i kornizës politike dhe ligjore që do të rregulloj procesin e përafrimit dhe anëtarësimit me BE-në. Marrëveshja do të jetë bazë ligjore për hapat e radhës se Kosovës në kuadër të procesit integrues në BE. Në kuadër të MSA-së, Kosova dhe BE-ja do të bëjnë zotime të ndërsjella. Në njërën anë vendi ynë për të ndërmarrë reforma edhe më të thella dhe në anën tjetër BE-ja për të ofruar mundësi reale për anëtarësim”, tha Ministrja Çitaku, transmeton express.
Ajo me tutje u shpreh se është inkurajuese se para tyre kanë një agjendë ambicioze, për një marrëveshje që do të përfshijë të gjitha elementet tradicionale të MSA-së, sikurse edhe për vendet tjera të rajonit.
Çitaku tha se presin që takimi i tretë dhe i fundit të mbahet në fund të muajit shkurt të vitit 2014, ku do të shënonte edhe përfundimin e procesit negociator dhe në pranverë të këtij viti pritet edhe vendosja e inicialeve në MSA.
Ndërsa, pas përfundimit të negociatave, ajo tha se teksti i MSA-së do të fillojë procesin zyrtar të miratimit në Parlamentin Evropian, Këshillin e Bashkimit Evropian, po ashtu edhe në Kuvendin e Kosovës.
Por, deputetët opozitarë kishin shumë kritika për Ministren por edhe qeverinë, duke thënë se MSA-ja ka qenë me shumë si rezultat i negociatave që ka zhvilluar Kosova me Serbinë.
Nënkryetari i Kuvendit, deputeti i Vetëvendosjes Glauk Konjufca tha se përmbushja e kritereve dhe kapitujve të MSA-së është parakusht i domosdoshëm që shteti të hyjë në rrugën e anëtarësimit të plotë në BE. Por ai ka ngritur tri çështje që kanë të bëjnë me MSA-në, në rastin e Kosovës.
“E para ka të bëjë me atë që mbetet problemi kryesor i MSA për Kosovën dhe me këtë rast shtrohet pyetja se cilët kanë qenë faktorët që Kosova të nis negociatat për këtë marrëveshje. Ne jemi dëshmitar se si raporti i progresit ngrit shqetësime të ndryshme sa i përket funksionimit të drejtësisë dhe demokracinë në Kosovë. Aty thuhet se drejtësia vuan nga ndërhyrjet politike në gjyqësorë. Kurse dihet fare mirë se drejtësia dhe sundimi i ligjit përbëjnë kapitujt kryesor të MSA-së. Atëherë nëse në Kosovë ka probleme serioze sa i përket sundimit të ligjit çka ndikoj çka ndikoj që BE të na shpërblej për MSA. Këtu dua të them se arsye kryesore që ka nisur ky proces ka të bëjë shumë me shumë me zemërgjërsinë e paskajshme që e ka treguar qeveria në negociata me Serbinë, e cila është përkthyer me koncesione dhe lëshime kapitale me marrëveshjen e 19 prillit me Serbinë”, tha Konjufca.
Ndërsa, shefi i Grupit Parlamentar të AAK-së Ardian Gjini tha se Ministrja e Integrimeve nuk mundet të ketë sukses derisa në të gjitha sferat tjera, sidomos në sundimin e ligjit, Kosova ka probleme të shumta.
“Kemi problem me gjithçka, me universitet, me Kuvend me Qeveri, me Polici, me sundim t ligjit, me gjyqësor, të gjitha janë probleme të mëdha. Dhe, nëse ministrja beson se këto do të përmirësohen me afat të shkurtër, me sinqeritetin me të madh po ju them edhe ne edhe Aleanca, si gjithmonë do të kishim mbështet ato që janë në të mirë të vendit. Por ne nuk po mund te besojmë se qeveria mund të bëjë diçka për të shkuar tutje”, tha Gjini.
Por, krejt në fund Ministrja e Integrimeve Evropiane, Vlora Çitaku iu ka përgjigjur kritikave të deputetëve. Ajo iu përgjigj pyetjeve rreth kostos që do ta ketë MSA-ja në buxhetin e Kosovës.
“Një ndër parakushtet për nisjen e negociatave për Stabilizim Asociim ka qenë edhe përgatitja e ndikimit financiar të marrëveshjes mbi buxhetit të Kosovës. Mbi bazën e parallogaritje që ka bërë ministria e tregtisë, Ministria e Financave, bashkë me BE-në, implikimet në buxhetin e Kosovës do të jenë 20 milion euro, asnjë cent me shumë, 20 milion euro, dhe Qeveria e Kosovës, përkatësisht Ministria e Financave ka përgatitur planin alternativ me të cilin do të kompensoheshin këto 20 milion euro”, tha Çitaku.
Deputetët pas këtij diskutimi, kanë shqyrtuar dhe miratuar edhe rekomandimin e Komisionit për Mbikëqyrjen e Financave Publike, lidhur me raportet e auditimit në Ministrinë e Shëndetësisë, Agjencionin Kosovar për Produkte Medicinale, Qendrën Klinike Universitare të Kosovës dhe Raportin e auditimit mbi menaxhimin e mbeturinave medicinale për vitin 2012. Po ashtu, me propozimi i Grupit Parlamentar të PDK-së për zëvendësimin e anëtarëve në komisionet parlamentare.