Për mungesë të një avokati janë shtyrë seancat e 21 dhe 22 janarit ndaj Nexhat Çoçajt dhe dy mësimdhënësve.
Në seancën e sotme ishin të pranishëm dy dëshmitarë, por mungonte avokati Osman Zajmi.
Kryetarja e trupit gjykues njoftoi të pranishmit se avokati Zajmi kishte lajmëruar gjykatën për mosprezencën e tij, ngase ishte i angazhuar në një gjykim të udhëhequr nga gjykatësit e EULEX-it.
Për mungesë të avokatit dhe me pajtimin e prokurorit të shtetit dhe të mbrojtjes, dy seancat e caktuara për datat 21 dhe 22 janar u shtynë.
Drejtori i Arsimit në Prizren Nexhat Çoçaj dhe dy mësimdhënësit Bekim Thaçi e Bedri Çeku akuzohen për keqpërdorim të manifestimit “Java e Remzi Ademajt”.
Shtyrja e seancave të janarit nuk i pëlqeu Nexhat Çoçajt që u ankua për zvarritje të gjykimit.
“Siç e dëgjuat edhe vetë, në mungesë të avokatit mbrojtës të njërit nga të bashkakuzuarit e mi, trupi gjykues vendosi që të shtyhet séanca e sotme për një ditë tjetër dhe kjo për mua nuk është mirë, por as për anëtarët tjerë të cilët jemi të akuzuar, sepse që katër vjet po zhagitet kjo lëndë,” tha Çoçaj.
Ai foli edhe për pengesat që po ia shkakton ky gjykim.
“Kjo lëndë po ndikon negativisht edhe në punën time, në karakterin tim, në personalitetin tim dhe pavarësisht asaj që unë kam deklaruar disa herë që unë kam besim në drejtësi, dëshiroj që kjo çështje sa më shpejt të zbardhet, sepse jam i akuzuar pa të drejtë,” deklaroi Çoçaj.
Çoçaj dhe dy mësimdhënësit aktakuza i ngarkon për keqpërdorimin për pesë vjet të parave të manifestimit “Java e Remzi Ademajt”./kallxo.com/