“Mospërfillja e kërkesave të qytetarëve nga ana e pushtetarëve për të shkuar në zgjedhje, ka të bëjë me frikën e humbjes së pushtetit, peshën e mëkatit që ndiejnë mbi supet e tyre për të bëmat e shumta ndaj popullit të tyre, që për pasojë kanë rënien e kredibilitetit dhe humbjen e legjitimitetit qytetar. Këtë më së miri ua treguan dy protestat e fundit të qytetarëve, që janë në përputhje të plotë me 200 mijë nënshkrimet e qytetarëve kundër veprimeve të tyre antishtetërore dhe antikushtetuese”, thotë analisti Florim Zeqa.
Situata e krijuar së fundmi në Kosovë tregon se ky vend është shndërruar në qeverisje totalitare prej sundimtarësh dhe në shtet policor, për shkak të këtyre pushtetarëve të korruptuar e arrogantë, që kanë vendosur në mënyrë të pashembullt ta luftojnë opozitën dhe qytetarët shumicë me të gjitha mjetet e dhunës. Është evidente se nëse kjo Qeveri do të qeverisë deri në vitin 2018, vendi do të katandiset shumë keq.
Kjo për faktin se kjo Qeveri nuk merr parasysh asgjë, as peticionin me 200 mijë nënshkrime dhe as mundësinë për të bërë dialog me opozitën. Duhet të bëhen bashkë, opozita e bashkuar, shoqëria civile, të pavarurit, iniciativat e reja qytetare, mediet e pavarura, për ta shpëtuar vendin, shtetin e nëpërkëmbur nga ky pushtet i inkriminuar dhe i dhunshëm që po rrëshqet drejt shkatërrimit të shtetit përmes tradhtisë kombëtare e shtetërore. Politologu i njohur kosovar, Nexhmedin Spahiu, duke komentuar situatën e krijuar, thotë se dorëheqja nuk është kiamet i madh.
“Çdo politikan normal në një situatë të tillë do të dorëhiqej. Natyrisht pos atyre që kanë përfunduar në bërllokun e historisë. Ramush Haradinaj dha dorëheqje për t’ua përkujtuar se nuk bëhet kiameti, nëse jep dorëheqje”, ka thënë ai për “Kosova Sot”