Festivali Ndërkombëtar i Filmit Dokumentar dhe të Shkurtër “DokuFest” është i nderuar të shpallë programin homazh në kujtim të filmëbërësit Albert Maysles, filmat e të cilit do të shfaqet në këtë edicion të festivalit.
Maysles, i cili vdiq në fillim të këtij viti në moshën 88 vjeçare, vinte nga linja e gjatë e filmëbërësve në kërkim të së vërtetës i cili ishte inspirim për shumë të tjerë që erdhën pas tij.
Programi përfshin shfaqjen e gjashtë filmave të Maysles: What’s Happening! The Beatles in the USA – historia qesharake dhe e sinqertë e mbërritjes së Beatles në Amerikë në shkurt të vitit 1964. Gimme Shelter – dokumentari historik i koncertit tragjik të Rolling Stones në Altamont Speedway më 6 dhjetor, 1969; Grey Gardens – historia e jashtëzakonshme por e vërtetë e Znj. Edith Bouvier Beale dhe vajzës së saj Edie, halla dhe kushërira e Jacqueline Kennedy Onassis; Concert of the Wills: Making the Getty Center – filmi për konceptimin, konstruktimin dhe kompletimin e Getty Center; In Transit – një udhëtim në Empire Builder, rrugën e trenit më të ngarkuar në Amerikë, në zemrat dhe mendjet e udhëtarëve të përditshëm; dhe Iris – portreti i një femre entuziazmi i së cilës për modën, artin dhe njerëzit na përkujton që veshja, dhe jeta, janë asgjë më shumë se një eksperiment. Filmi In Transit poashtu shfaqet si pjesë e Garës Nderkombetarë të Dokumentarëve të festivalit.
“Kurioz dhe bujar, një mësues dhe mentor, një filmëbërës i cili ka revolucionalizuar filmin dokumentar dhe ka inspiruar një gjeneratë të filmëbërësve,” tha Drejtori Artistik i “DokuFest”, Veton Nurkollari.
Albert Maysles është njëri ndër artistët më të rëndësishëm të filmave dokumentarë modern. Bashkë me vëllaun e tij David ata janë të njohur si pionierët e kinemasë “direct”, versionin amerikan të “cinema verité”-së franceze. Ata fituan reputacionin e tyre të shquar duke qenë të parët që xhiruan filma të gjatë jo-fiktiv – filma ku drama e jetës njerëzore shpaloset ashtu si është: pa skenar dhe pa narracion.
TRAILER I PROGRAMIT: https://www.youtube.com/watch?v=76gbuA_umBQ
Program i plotë i filmave do të shpallet më 18 korrik në webfaqen tonë. /PrizrenPress.com/