Komunën e Dragashit sot e vizitoi koordinatori i Qendrës Kulturore të Kosovës në Bursa të Turqisë, Recep Gündüz, i cili u prit nga kryetari i komunës, Bexhet Xheladini, kryesuesja e kuvendit, Arijeta Skeraj, dhe pjesëtarë të tjerë të kabinetit.
Kryetari Xheladini e falënderoi për vizitën Gündüz, duke i shprehur mirënjohjen e tij për mikpritjen gjatë vizitës studimore vitin e kaluar dhe ndërmjetësimin në realizimin e takimeve zyrtare me përfaqësues të Komunës Orhaneli dhe Komunës së Bursës në Republikën e Turqisë.
Në këtë takim u diskutua gjithashtu për vazhdimin e bashkëpunimit me Qendrën Kulturore të Bursas, duke shqyrtuar mundësitë e vizitave të ndërsjella, me qëllim të forcimit të lidhjeve dhe shkëmbimit të përvojave mes institucioneve lokale të Kosovës dhe Turqisë.
Koordinatorin e Qendrës Kulturore të Bursas e ka pritur në zyrën e saj edhe kryesuesja e Kuvendit, Arijeta Skeraj, e cila në emër të Kuvendit Komunal e ka falënderuar për vizitën, si dhe për mikpritjen e jashtëzakonshme që u ka bërë përfaqësuesve të Komunës së Dragashit gjatë vizitës studimore të vitit të kaluar në Turqi.
Pas këtyre takimeve, kryetari i Komunës, kryesuesja e Kuvendit dhe koordinatori Qendrës Kulturore të Bursas, Recep Gündüz, patën edhe një vizitë të shkurtër në selinë e LMT-së së KFOR-it Turk, Njësia në Dragash.