Zbatimi i drejtësisë me dy standarde është kthyer në normë dhe procedurë normale. Mijëra raste të qytetarëve të thjeshtë, apo mijëra raste që kanë të bëjnë me jetën dhe shëndetin e qytetarëve zvarriten, ndërsa raste të tjera, ku janë përfshirë politikanë, familjarë të tyre, gjyqtarë e prokurorë apo edhe familjarë të tyre, procedohen në kohë rekord dhe për më tepër gjithçka vendoset në favor të tyre. Hetimet në rastin e grurit kancoregjen, hetimet në rastin e privatizimit të Fabrikës së Amortizatorëve apo edhe për shumë privatizime të tjera po zvarriten, ndërsa raste të zyrtarëve të lartë apo familjarëve të tyre, nëse organet hetuese arrijnë të manipulojnë provat i procedojnë në kohë rekord, apo kur kanë provat dhe nuk arrijnë t’i zhdukin, i lënë deri në parashkrim.
Analisti Florim Zeqa thotë se në rastet ku preken interesat e bizneseve të pushtetarëve, hetimet ndërpriten ose prolongohen në kohë të pacaktuar.
“Në rastet ku preken interesat e bizneseve të pushtetarëve, siç ishte rasti i importimit të grurit për kafshë nga Serbia, hetimet ndërpriten ose prolongohen në kohë të pacaktuar. Gruri i destinuar për kafshë, i hedhur në treg për njerëzit, klasifikohet si një krim i rëndë dhe i dyfishtë. Përpos që rrezikon shëndetin e qytetarëve, i shkakton dëme ekonomike vendit, për shkak të produktit të evazionit fiskal”, është shprehur analisti Florim Zeqa. /Kosova Sot