Drejtuesit aktualë të “DokuFestit”, Veton Nurkollari e Eroll Bilibani, janë radhitur në mesin e 100 personave që kanë frymëzuar ndryshime në Evropën Lindore dhe atë Qendrore në listën e krijuar nga “NewEurope 100”, projekt ky i nisur nga “ResPublica”, “Google”, Fondi i Vishegradit, në bashkëpunim me “Financial Times” dhe disa institucioneve nga ky rajon.
Në këtë listë kanë gjetur vend individë që kanë inspiruar ndryshime në komunitetin e tyre, por edhe në aspektin global duke përdorur teknologjinë dhe shtrirjen shoqërore. Në këtë listë prej 100 emrash hasen edhe programerët nga Skype, themeluesit e antivirusit, AVAST dhe PREZI.COM, që njihet si njëra prej uebfaqeve të avancuara të prezantimeve profesionale.
Sipas përpiluesve të listës, Nurkollari dhe Bilibani e kanë merituar vendin në këtë qindëshe “për lidhjen që kanë mundësuar ndërmjet gjuhës së teknologjisë dhe kinemasë”.
Në përshkrimin e dhënë në uebfaqen e NE100 thuhet se emri i Kosovës në saje të paragjykimeve lidhet vetëm me luftën dhe vrasjen, përderisa dy aktivistët e përzgjedhur kanë bërë përpjekje që të kapërcejnë këtë imazh tragjik gjatë 13 viteve duke e rikthyer Prizrenin si kryeqendër kulturore të Kosovës.
“Ata kanë krijuar festivalin ndërkombëtar të filmit dokumentar dhe të shkurtër ‘DokuFest’. Pa kinema funksionale në Prizren, Nurkollari dhe Bilibani kanë gjetur mënyrën për të zgjidhur problemin duke e shndërruar qytetin në kinema të hapur.
Përkundër mungesës së përkrahjes, mjeteve financiare dhe situatës së vështirë të pasluftës, festivali është shndërruar në ngjarjen kryesore filmike në Kosovë me një reputacion në rritje në mbarë botën.
Me kalimin e viteve, themeluesit e “DokuFestit” kanë dëshmuar dobitë kulturore dhe edukative të festivalit për Kosovën dhe rajonin”, thuhet në uebfaqen e NE100.