Në Komandën e Forcave Tokësore të Forcës së Sigurisë së Kosovës, në kazermën ,,Adem Jashari’’, sot u përcollën për jashtë vendit dy togje të FSK-së. Njëri udhëtoi për Turqi dhe tjetri për Holandë.
Një tog prej 33 pjesëtarëve, nën komandën e Major Enver Vocës, udhëtoi për në Republikën e Turqisë, ku në kuadër të bashkëpunimit bilateral në mes të Ushtrisë së Turqisë dhe FSK-së, do të marrë pjesë në trajnimin dy javor të “Kërkim – shpëtimit urban”.
Togu tjetër prej 30 pjesëtarëve, nën drejtimin e Toger Fatbardha Osaj, udhëtoi për të marrë pjesë në ,,Marshin tradicional katër ditor në Nijmegen të Holandës’’.
Ky është një marshim i ushtrive të botës, ku FSK-ja në dy vitet e kaluar ka qenë ndër të parat dhe është nderuar me medalje.
Për ti përcjellë këto dy togje jashtë vendit kishte dalë komandanti i Komandës së Forcës Tokësore (KFT) të FSK-së gjeneralmajor Rrahman Rama dhe Shefi i Shtabit të KFT-së kolonel Naim Haziri dhe epror të tjerë,transmeton Telegrafi.
Gjeneral Rama ,duke i përshëndetur pjesëtarët e FSK-së, iu uroi sukses në trajnime, duke kërkuar që ta përfaqësojnë denjësisht FSK-në dhe Kosovën. Kurse garuesve në Holandë ju uroi sukses me kërkesën që të përsërisin suksesin e dy herave të kaluara dhe të kthehen me rezultate të larta nga marshimi në Holandë.