Kryetari i Bashkimit Demokratik, Zafir Berisha, ka paralajmëruar se në zgjedhjet nacionale rrugëtimin e tij politik mund ta vazhdoj përkrah ish-deputetit të PDK-së, Fatmir Limaj.
Berisha tha se në zgjedhjet nacionale BD-ja do të mund të krijojë koalicion me iniciativën politike që pritet ta formoj Limaj.
“Ne jemi miq prej kohësh dhe gjatë takimeve të cilat i kemi zhvilluar kemi biseduar se si do të mund t’i bashkërendonim punët për zgjedhjet nacionale. Unë jam i gatshëm për t’i hyrë garës, për më tepër si bashkëpunëtor i dy figurave të njohura të skenës politike Fatmir Limajt dhe Jakup Krasniqit”, ka thënë Berisha për Telegrafin.
Deputeti Fatmir Limaj, ditë më parë ka deklaruar se ai më nuk është pjesë e Partisë Demokratike të Kosovës. “Nga viti 2012 unë më nuk e kam parë vetën pjesë të PDK-së. Pra, sot edhe publikisht dhe formalisht e them se e pushoj aktivitetin tim në PDK. Ne shumë shpejt do të dalim me një ofertë të re politike para qytetarëve të Republikës së Kosovës”, kishte deklaruar Limaj.